თანდათან მკრთალდება
და შორეულდება
ზედმეტი თარიღებით დაჭორფლილი
ტალღები დროისა.

***
მაგრამ ვის ახსოვს
ცის ის ადგილები,
სადაც დაიბადა პირველი ვარსკვლავი,
სადაც ბოლო ვარსკვლავს
აისის მელოდია ჩაესმა.

***
ზეცას ის უფრო უხარია,
ზარები როცა დუმან
და გულების რეკვა მოისმის.

***
სახლს საძირკველი ჩაუყარეს,
ხოლო მან უკვე
ამ სახლის სახურავზე
ჩამომსხდარი მტრედები იხილა.

***
ოდნავ გახსნილი ქოლგებივით
მოჩანან ზამთრის მკრთალ სინათლეში
მოწყენილი,ფერმკრთალი ხეები.

***
უფსკრულებს შორის გაკიდებულ
მწვანე სხივზე გადადის სიყვარული.
ესაა მისი გზა ულამაზესი,
მისი ბედისწერა ესაა...

***
მრავალწერტილები სიყვარულის
პატარა ბარათში_
თითქოს ვარსკვლავების
ბავშვობა იხილე...

***
ცამ ღრუბელი ჩამოიშორა_
თითქოს მთელი სამყაროს კარი
გაგიღო და
მზესთან ერთად გვეპატიჟება.

***
ფრინველები გადაიკარგნენ_
თითქოს ცას სახეზე
სიხარულის ცრემლები შეაშრა.

***
ნეტავი იმ დროს,
როდესაც სიცოცხლემ და სიკვდილმა
პირველი ხნული ერთად გაიტანეს
და პირველი წყაროც ერთად აღმოაჩინეს.

***
აი,ჩემი პატარა სახლი:
კედლები_ბალახყვავილებით
მოქსოვილ-მოწნული
და კარი სანთლისა...

***
ყველაზე ბედნიერი პატიმარი_
ძაფი ბამბისა,
სანთლის გულში გამომწყვდეული.

***
ნებისმიერ ნაპირთან მისვლისას
გახსოვდეს:
შენი ცხადის სითბო ვარ
და სინათლე_შენი სიზმრისა.

***
დასალიერზე,ღრუბლის ბუხართან,
ისვენებს ჩამავალი მნათობი,
როგორც ქალი, სამკალში დაღლილი.