ცა ცის ბანზე ამზეურებს
მზის პერანგებს, ნაოფლარს.
გზა კოფოზე უზის ურემს,
მიმოსაყვანს ამ სოფლად.
მკათათვეა, თავს ესხმიან
მწიფე თავთავს ჩიტები.
გულს საკინძე ცას შეხსნია
ცისფერ მარგალიტების...
მზეს ექნება სამკალიო,
თავთავს თავი ემძიმა.
არ გადადებს სახვალიოდ,
თუ არ ჩამოეძინა...
ჩამომდგარან ძნები მწკრივად,
ჩალისფერი ბოხოხით.
აფრენილა ჭალა-ტყიდან
ტანხატულა ხოხობი.
ბილიკს შარა ჩამოურბენს,
შარას კიდევ ორღობე.
კოფოზე გზა უზის ურემს,
ფეხით რომ არ მორბოდეს...
04.07.21