დავინიშნე საიდუმლო ნიშნით,
ზეცა მაყრის თავზე წვიმის მძივებს,
შენთან ვარ და წასვლაში ხელს მიშლის
გული, შენი სიყვარულით მძიმე,
სული ვარდის ფურცლებივით სათნო,
ბაგეები ჩემთვის ლოცვით მთვრალი...
ან კი ისე როგორ უნდა დაგთმო,
სიყვარულში რომ არ დაგდო ბრალი.
ყვავილები და თვალები გიშრის...
შეგეჩვიე, შემეჩვიე ძლიერ...
ჩემთან ხარ და წასვლაში ხელს გიშლის
გული, ჩემი სიყვარულით მძიმე.