ნინო დარბაისელი

ქალია, ადამიანი?!

(კობა ჭუმბურიძეს )

ძვირფასო ანგელოზებო!
ძვირფასო ანგელოზებო,
თავზე დამბზუით ხალისით,
როგორც რომ რთველში - ბუზი.

ძვირფასო ანგელოზებო,
მე თქვენნაირი  როდი ვარ,
თქვენ რომ დაფრინავთ,
მე მაშინ რამე ხელსაქმეს ვუზი.

ვარ ერთი ადამიანი,
ადამიანებს უფლება,
ნება და პრივილეგია
საჩვენოდ გვინდა მუდამ;

მოვალეობა, შეზღუდვა,
ათასნაირი აკრძალვა
დე, სხვას შეეხოს,
სხვამ ზიდოს პასუხისგების გუდა!

კანონი  გვინდა ისეთი,
მოგვერგოს მარჯვედ ნაწერი,
სხვა გამოვიდეს მტყუანი,
ჩვენ კი - მართალი ცამდის.

ესაა ადამიანი,
ადამიანი - ეს იყო
და სულ ასეთი იქნება!
გამყავს - სადამდეც  გამდის!