ჰორიზონტზე,სადაც ახლა
კვამლია თვითმფრინავის,
ძველად საოცრება მოჩანდა:
ცხენი და მხედარი
და მათ სიახლოვეს მზე ამომავალი.

***
ფრთებდაკეცილი
ხელისგულზე მოგითავსდება
და ფრთეგაშლილს ცა ევიწროვება.

***
წიგნში ბარათი.ბარათში ყვავილი.
ყვავილში ჩუმი სევდა ცრემლისა.

***
დასალიერზე მზე ჩადის და
მგზავრი ამოდის,
წამით შეჩერდნენ და ერთმანეთს
ღმერთის სითბო გაუნაწილეს.

***
დედის მანდილივით ლამაზად გაცრეცილი,
ლამის გამჭვირვალე ხელნაწერი
და სიტყვები,ერთმანეთის მამშვენებელი,
სამშობლოსკენ მიმავალ მგზავრებივით.

***
სულ ცისკენ მიიჩქარის კალმახი,
ამიტომ არის
ვარსკვლავებით ტანმოხატული,
ელვასავით სუფთა და მოქნილი.

სიზმარი
-------------
გულის რომელიღაც სარკმელს შემოაღებს,
შემოანათებს,ვით უცხო სასწაული,
და გაუჩინარდება
და სარკმელი ღია დარჩება...

განახევრებული  სოფელი
---------------------------------------
თითქოს სევდიანი სიმღერაა
დედამიწის სახეზე დახატული.

***
შეუმჩნეველი და ბედნიერი,
ვით მშვიდობიანი სახლის გასაღები
უბრალო ჩანთაში...

***
ადამიანის გამოგონებული
ნაპირები როგორ ამშვენებს
ღვთის უნაპირობას...