უილიამ ბატლერ იეიტსი - მთის სამარე

დაასხით ღვინო, ვაჟკაცობის თუ შეგრჩათ მადლი,
იცეკვეთ, ვარდის სურნელებით აავსეთ ბინა;
მთიდან ჩანჩქერი გადმოქუხს და წყალს კვამლი ასდის,
როზენკროიცერს - მამას ჩვენსას საფლავში სძინავს. 

დაუშვით ფარდა და აჰყევით მხიარულ ჰანგებს
სტვირის და ჩანგის, ათამაშდით ფერხულში ყინჩად,
დარწყულდით ღვინით, დაისველეთ ამბორით ბაგე,
როზენკროიცერს - მამას ჩვენსას საფლავში სძინავს. 

კირთებით, ფუჭად მთის ჩანჩქერი ხმამაღლა ტირის,
უკუნს ანათებს მარადიულ კანდელის ბრწყინვა,
ონიქსის თვალში დატეული საუნჯით სიბრძნის,
როზენკროიცერს - მამას ჩვენსას საფლავში სძინავს. 

10 ივლისი, 2023 წ.


ორიგინალი იხილეთ აქ:  https://allpoetry.com/The-Mountain-Tomb