„უსამართლო კვლავ უსამართლობდეს, ბილწი კვლავინდებურად ბილწობდეს, მართალი კვლავ მართლობდეს და წმიდა კვლავაც წმიდობდეს“ (გამოცხადება 22:11)

უსამართლობს უსამართლო,
მრუდობს ადამიანი
და მართალი ისევ მართლობს,
კვლავ წმინდანობს წმინდანი,

აფთრის ჯიშის ისევ აფთრობს,
ბილწს სურს სხვებიც წაბილწოს,
მგლის მოქცევას ცდილობს სათნო,
წარღვნა რომ არ დაიწყოს,

ჯოჯოხეთის გამალება,
სიძვა, ტანის თანთალი...
უსასრულოდ გამრავლდება
ბოროტი და ავთვალი,

ვიღას ახსოვს რჯული, მცნება
და ღვთის შემონათვალი,
თითქმის არსად აღარ რჩება
უკვე ათი მართალიც...

8 ოქტომბერი, 2023 წ.