* * *
ვდგავარ სარკის წინ,
საიდანაც უცხო კაცი მიღიმის.
ლიანდაგზე კვლავ იკივლა მატარებელმა.


* * *
ამ გაზაფხულზე
ალუჩის კვირტები ისე გადაიშალა,
როგორც შენი მკერდი მაშინ.


* * *
აგვისტოს სიცხე
ნაყინი
ბავშვი
სიგარეტის კვამლი
მამა.


* * *
ცოტაც და ჩავთვლემ
კანაფების და ფიჭვების ქალაქში,
სულ ერთი წამით თვალს ვუსწორებ მთვარეს...


* * *
კოლხეთის დაბლობზე მიაბიჯებს გველი ანკარა.
- გამარჯობა!..
და ასე იშვა ჰაიკუ.


* * *
ჩართული ტელევიზორი.
დამტვერილი აბაჟური.
წიგნი სანიშნით.
ჰიაცინტები.



* * *
შავი ღამე
მიყრუებულ ქალაქს გაუწყრა
და თეთრი კბილი გამოაჩინა.


* * *
თენდება.
ქალი წევს, სიგარეტი იწვის,
ცარიელი კოლოფი კაცივით იმზირება.


* * *
აი, ომიც დასრულდა. წავაგეთ.
სირცხვილს რა ვუყოთ?
ან ცხედრებს.
და ვალებს?