#ლექსები

ნინო დარბაისელი

მზე-ქვის  სონეტი

პირამიდის წვერზე მზე რომ გაიშლება,
სიცივეა ჯერაც.
თუკი შეესწარი,  იტყვი: აი შვება,
სასწაულის მჯერა!

ღვიძავთ ბედუინებს,  ლანდებს მონაყინებს
აფრთხობს  ნაყვირები.
ყარან აქლემები. ვირს რა აყროყინებს?
ყრია  აღვირები.

შარდის მძიმე სუნი  მზეში გამძაფრდება,
ყნოსვა ეგუება.
ქრება  მოჩვენება - მოქათქათეფრთება,
გული გეგულება.

მოკვდავს ერჩის  ოდენ აწმყო და მერმისი,
ქვაა - მარადისი!