ფეხსაცმელების ნამგალა ჭრილებიდან
თითქოს ხუთ-ხუთი
თეთრი ხვლიკი მოგჩერებია...

***
გაუქმებული სალამურივით
ფერმკრთალი და სევდიანია
ღარი,წყაროს გარეშე დარჩენილი.

***
საიქიოს წყვდიადში წინაპრები
უფრო კარგად ხედავენ ერთმენეთს,
ვიდრე სამზეოზე შვილები მათი.


მშვენიერების ლხინი
------------------------------
ისე მღერიან,ლამის მამღერონ,
სუფრაზე ვხედავ ხილსა და ყვავილს.
უხდება ბოცას მწვანე საყელო
და მეოცნებე,ხოტორა თავი.

სურნელი პურის,თაფლის,სალათის,
იგრძნობ,დარჩები,კარებს მოიჯრი.
უხდება ბოცას წნელის ხალათი
და დარბაისელ გლეხის დოინჯი.

***
გულმა ვარსკვლავებს უთხრა,მიყვარსო,
და გაზაფხული მეასმათება...
ისევ ერთნი ვართ,როგორც,ძვირფასო,
ხე და შრიალი,მზე და ნათება.

გზა ვიწროვდება და ცას ენდობი
და წყაროების ისმის ვედრება...
ისევ ერთნი ვართ და ამ ერთობით
სამყაროს ხმები უფრო მშვენდება.

***
სააქაოსა და საიქიოს
იისფერ საზღვარზე
მხოლოდ დედის აჩრდილი გადაჰყვა
და გზა გაუნათა...

***
ღმერთის სახე უსასრულო,
ნათელი ფონია
და ჩვენი სახეები_
ამ ფონის ყვავილები.

***
ვერ მოთავსდება ღმერთი ბიბლიაში,
როგორც ერთ სარკმელში
ცა ვარსკვლავებიანი...