ნატვრა უდაბნოში ხედ ამოიზრდება
და შენს სიტყვებს
მოისხამს ყვავილებად...

***
ვარსკვლავები არც ისე შორსაა_
ერთი გაწვდენაა მზერისა...
შენ რატომ გგონია,
რომ შორსა ვართ ერთმანეთისგან.

***
მხოლოდ სიყვარულის
სივრცეში მრავლობენ
მზესუმზირას ფურცლებივით
ლამაზი სიტყვები.

***
ზეცის სიყვარული რომ არა,
დედამიწა
მწვერვალებით არ ამაღლდებოდა.

***
მაღლა-მაღლა დაფრინავს
და ღმერთში იძირება.
ჩრდილი მეშვიდე ცის
ღრუბლებზე დატოვა...

***
უდაბნოს თავზე რა უნდათ მერცხლებს?
დიდი ხნის მერე იპოვეს ერთმანეთი
და ახლა მშობლიური
სივრცისაკენ გაფრინდებიან,
თანაც უფრო მაღლა იფრენენ...

***
ყველა ვარსკვლავი სიყვარულის
მწვანე ძაფითაა ცას მიმაგრებული.

***
ცისა და დედამიწის საზღვარზე
შუქთან ერთად გაუჩინარდა...
გულის ნამს
სევდიანი სითბო გაერია.

ზამთარი
--------------
პალტოს ჯიბეში ორი ხელი,
როგორც თბილ ბუდეში
ერთურთის მოყვარული ქედნები.

***
მკვდარი ზარივით ჰკიდია სახრჩობელას,
ხოლო სახრჩობელას ბოძები
ცის ნაპრალებივით მოჩანან...

***
წაიქცა სახლი
და მიწიდან წინაპრის ჩრდილი
ამოიზარდა და გაქვავდა.