განწყობა -1
დღე - დალაქული მოლბერტი,
განწყობა - ფოთლები ქარში.
კაცი - ცარიელი კონვერტი,
ქალი - მენდელსონის მარში...

      განწყობა -2
  ფიქრში ჩემს წარსულს ვფურცლავ თავებად,
  თავდაკარგულ დროს ვზომავ წუთებით.
  ჩემი ცხოვრებაც იქ გათავდება,
  წუთს წამითაც რომ არ მოვუნდები.

        განწყობა -3
  ფანჯრებს შერჩენიათ ზამთრის ორნამენტი,
  ყინვის სარკეებში ცა ისევ რუხია.
  თვე - იანვარი, რიცხვი - ოცდაერთი,
  განწყობამ კალენდარს დღე გადაუხია.

        განწყობა -4
დღეთა ნამსხვრევები ჩემია უკლებლივ,
მქრქალი დღე სევდასთან ასრულებს უნისონს.
დღე არის მარტივი, განწყობის უქმეა
და აქ სიმარტოვე თავის თავს გულისხმობს...

        განწყობა -5
განწყობა - უსამოსო საკიდარი,
ამინდი - ქალური ლოგიკა.
ახლა, ის არის საკითხავი,
გულს პირველი ვინ მომიკლავს?
ბედი - ოღრო-ჩოღრო, რილო-ჭრილო,
კაცი - ღორის კარგი სამწვადე.
მზერა - ოდნავ მარცხნივ, ირიბ ჭრილში,
ფიქრი - ფოტოები დაწვამდე...

        განწყობა -13
  ჰგავს დღეები გასწორებულ ლოგინებს,
  ემოცია დგას გაღებულ კართან.
  შეიძლება, აღარასდროს მომინდე,
  გ კ ა რ გ ა ვ...