--------------------------------------------------------------------------------

***
ეს უკვე სასწაულზე მეტია:
ცა და დედამიწა
გულში საუბრობენ.

***
საიქიოდან სააქაოში
გადმოსახლება რომ შეიძლებოდეს,
მხოლოდ მათხოვრები
და მონები დაბრუნდებოდნენ.

***
წვიმაში შევიდა,
წვიმის ლურჯი კარი
შრიალით მიიხურა
და გაუჩინარდა...

***
როგორ უხდება დედამიწას
ჩრდილის ფურცლებით დაბებკილი
სინათლის ხალათი...

***
სიყვარულის ფრთების სითბო
მოაკლდა სივრცეებს
და ქვეყენაზე სევდიანმა
სიცივემ იმატა...

***
ზოგიერთი ისე გაიცინებს,
თითქოს შენი სახის სიახლოვეს
ყინულის ნატეხმა
ან დანამ გაიელვა...

***
ჩრდილის შანდალში
მწვანე კელაპტარი,
რომელიც თეთრი ალით
ცას ესაუბრება...

***
როგორც გაზაფხულის
სივრცეში ფრინველები,
გულში შენი
სიტყვები ხარობენ.

***
შორიდან
ღმერთი
მოვიდა
შენთვის.

***
როდესაც სიმღერა
თავგანწირულ სიყვარულს ეძღვნება,
მაშინ წყდება გიტარის სიმი.