დუბლი 1 


დაიბადე უბრალობით დაქანცული,
შემჩნეული შეუმჩნევთა გრძელ რიგებში,
აღარ გინდა დასაწყისით დასასრული,
დაიღალე ცხოვრებასთან შერიგებით.

ჰო და ... ნიჩბებს მორევისკენ ფრთხილად უსვამ,
და გრძნობ სურნელს აწმყოსაგან განშორების,
გადაგღალა გაწერილმა სილაბუსმა,
გეზიზღება გაცვეთილი შაბლონები!..

მალე, დროში შეუზღუდავ ცურვის რიტმებს,
გაცვლი ძნელად გადასასვლელ აღმართებზე,
მწვერვალისგან მიმავალი ვეღარ ითმენ,
განდიდების უღმრეთობა გააღმერთე...

თავს დასახულ მიზნებისკენ მიუთითებ,
სტანდარტების ყველა ზღვარი გადაკვეთე…



დუბლი 2


მწვერვალისკენ ნაბიჯებით -  გაბედული,
ფეხქვეშ თელავ ცხადად ქცეულ ლამაზ სიზმრებს,
გაამეფე პრინციპები – ზღვად ქცეული,
წარსული კი – ჭაობიდან შურით გიმზერს.

გაიზარდე, ახლა ახლოს არც იკარებ,
პირველ დუბლში, პირველ სტროფის მოქმედ გმირებს,
უბილეთოდ აღარავის უხსნი კარებს,
გულში ყველა ნაზი გრძნობა განიგმირე...

აღარ რჩება შენში წვეთი სტანდარტული,
უკვე ყველა ჩარეცხილ წყლებს გააყოლე,
დაიპყარი ყველას წილი საგანძური
ახლა ქვემოთ მხოლოდ შენით ამაყობენ.



მაგრამ ... უკვე მწვერვალზე ხარ, სხვა სიმაღლე
არ არსებობს, ვერც ვერავის შეებმები,
უკვე ყველა მიზნისაგან განინაღმე,
დრო გიდგება კვლავ დაღმართის შემეცნების...


. . . . . . . . . . . . . . . . . . . . . . . . . . . .


ერთ ადგილას იყინები, აღიარებ,
ბრბოსგან ალესილი ჩლუნგდება ეშვებიც...

და
ჯოჯოხეთის კარს სიფრთხილით შეაღებ...
მაღალ მწვერვალიდან უფსკრულში ეშვები...