მე შენში მიყვარდა უბრალოდ სიშორე,
უბრალოდ ოცნება მიყვარდა ჩემი.
ღამით ხეტიალში ფიქრები ვიპოვე
მქროლავი, ოქროსფერ ფოთოლთა სწორი.
დროსაც დავემდურე, ქარებს შევუშინდი
ტყუილებს ვკერავდი ფარდად.
ოცნებას ვიხვევდი, ისე ვიძინებდი
სული მომიწამლა დარდმა.
სიცივეს ვეძებდი ჩემსავით დაუცველს,
ფერწაშლილს მიგავდა სახე,
ცოდვებდაბერილი ამ დედამიწაზე
მე ბევრი სამოთხე ვნახე.
მე შენში მიყვარდა ოცნება მალული,
უთქმელი დარდი და სევდა.
ისევ შემეშინდა, ისევ ვერ მოვედი
დავთმე სიხარული ფერთა,
წამებს დავეძებდი, ნისლიან მორევში
გადახრილ ტოტებს რომ შვენის,
მაინც ვერ მოვედი, მაინც დავიტოვე
მეგზურად სიშორე შენი...