მაცხოვრის  შობის  დიდ  დღესასწაულს  გილოცავთ!
სამების  მადლი  და  ღვთისმშობლის  ლოცვა  არ  მოგკლებოდეთ!


კვლავ  ჩემს  ბილიკს  მივდევ  და
ჩემს  წყალ-ჭალას  მივტოპავ...
ეშველება  ყველაფერს,
ღმერთმა  თუ  ჰქნა  მშვიდობა...

ღმერთმა  თუ  ჰქნა  შენდობა,
დანდობა  და  მინდობა,
მოვესწრებით  მირიად
ვარდობას  და  შინდობას...

თუ  ეშმამ  და  მოშურნემ
სულიც  არ  დაგვითოფა...
თუ  კაცობად  არ  ითქვა
ლაჩრობა  და  ფლიდობა...
თუ  წყალს  არ  გავატანეთ
ჩვენი  ავლადიდება...

დღემდე  ვერდასათმობი
ან  ხვალ  ვით  დაითმობა?!.
- ამ  ღვთისწილხვედრ  მამულში
ჯიშის  ჩვენის  მკვიდრობა!..

თუ  ღმერთი  არ  გაწყრა  და
მთლად  არ  დაგვემშვიდობა,
ჩვენს  წყლულთაც  ის  უწამლებს
-  ცის  ცრემლით  და  მზით  მობანს...

და  სურნელით  მირონის
სულიც  ვიდრე  ითრობა,
მივნდობილვარ  ღვთის  ნებას,
ვით  მხსნელ  ნოეს  კიდობანს...
-  ამ  ცასა  და  ამ  მიწას,
ღმერთო,  მოეც  მშვიდობა!!!