მე – რეციპიენტი, შენ კი დონორი.
განცდების გადასხმით მაცოცხლებ თავიდან.
ბგერებს გავურიე სულ ცოტა მინორი,
სისხლში კი ოცნება ბოლომდე გამიქრა.

შეუთავსებლობა რეზუს ფაქტორშია.
(მოდი, დავაბრალებ ყველაფერს ამას).
ვნებით გაჟღენთილი ბევრი ატომია,
რომელთაც აღარ აქვთ საბრძოლო ძალა.

რეგრესი პიკზეა, სიმპტომთა კომპლექსი
იზრდება და ეძებს ლეტალურ ფინალს.
შეცნობა აღარ აქვს დაბინდულ გონებას,
ტვინისკენ მომავალ სურვილებს თიშავს.

ანამნეზს მიკრიბავს ზეცაში უფალი,
ვიცი, რომ გადაჭრის სიცოცხლის ძაფსაც.
გულსაც ძველებურად აღარ აქვს უნარი
ფეთქვის და ატიპურ სიყვარულს ართავს.

ჰემოქრომატოზი,  კუშინგის სინდრომი,
იქნებ ადისონი ან სულაც კიბო?
ისევ გარეულა ბგერებში მინორი,
თვალებში გამქრალა შენფერი სითბო.

ფაქტი კი ერთია, სისხლშია ტოქსინი!
და გულის რიტმსაც ის არღვევს მხოლოდ.
უფალსაც მოსწყინდა ამდენი ლოდინი,
ანამნეზს ვერდიქტად დაუსვა ბოლო.

მე – რეციპიენტი, შენ კი დონორი,
და ამ გრძნობებმა მოწამლეს სისხლი.
პიკზეა სხეულში სიკვდილის ჰორმონი,
ჩემი დიაგნოზი? – სურვილთა შიდსი.