ვინ რას გაუგებს სიყვარულს
როგორც ჰაერის შრიალსა
როგორც ვარსკვლავთა ნათებას
და წყაროების წკრიალსა.

ვინ რას გაუგებს სიყვარულს
როგორც საწუთროს ტიალსა
როგორც ღრუბლების სიჩუმეს
უმზეოსა და მზიანსა.

სულ სხვა სამოსელს ჩაგაცმევს
მსუბუქსა როგორც ნიავსა
სულ სხვა სიმღერებს გამღერებს
მტრედის და მერცხლის ფრთიანსა
ყინულზე მოგაკრეფინებს
ენძელასა და იასა…

ვინ რას გაუგებს სიყვარულს
როგორც სიღრმეებს ცისასა
ან_როგორც მშვენიერებას
სიცოცხლე-სიკვდილისასა.


ყვავილის ზღაპრად გეჩვენა
-------------------------------------

სიმაღლეების ტრფიალმა_
ფიქრმა მოგიგდო ფრთებზედა
წაგიღო…
ჩრდილმა ლამაზმა
გადაიარა მზეზედა
სხვა სასწაული იხილე
ცისა და მიწის გზებზედა.

ყვავილის ზღაპრად გეჩვენა
რაც დაწერილა ღმერთზედა.


***
როდესაც ღმერთი გკარნახობს
/არ იფიქრო რომ შორია/_
ლექსის წერაზე ადვილი
აღარაფერი მგონია…

როცა ფურცელთან მარტო ხარ
და უღმერთობის ბინდია_
გინდ ლექსი გიწერია და
გინდ ქვა ფრჩხილებით გითლია.


შუქივით შემოგეხვევი
--------------------------
ზამთრის ცას გაგილამაზებ,
დღეებს გიმრავლებ მწვანესა.

თავდავიწყების ნიავი
ამოანათებს თვალებსა...

შუქივით შემოგეხვევი,
დგიწვენ გულის მხარესა.