ჯოჯოხეთიდან
გზას გამოჰყვა მონატრებისას
და სამოთხის შუაგულში იხილა იგი,
დიდი ხნის წინათ
ვისაც უძღვნა პირველი სიმღერა.

***
"რატომ წერ ლექსებს?"
"რატომ შრიალებს ყანა
ან ღრუბელი რატომ ანათებს?"

***
შვილი მოსახვევს მოეფარა
და თითქოს იმ ადგილას
ცა უფრო განათდა
და ვარსკვლავებად გამოისხა
თვალები დედისა...

***
სიტყვა "ბოდიში" სინანულის
მშვენიერი
და ბრძენი შვილია.

***
ჩემს გულში გაწვიმს,
ჩემს გულში გათოვს
და მე არასოდეს
არა ვარ მარტო.

***
ფანქარი ისე ჩაუშვა ჯიბეში,
ვით ორმოში
ფესვი ნერგისა...

ფრინველები
-----------------
ერთი დუმს კენწეროზე,
ხოლო სხვები ქვემოთა ტოტებზე
ერთმანეთს გალობას არ აცლიან.