არხოტელ ქალწულს

ამ გზით ქისტები ამოდიოდნენ
და რომ ვერ გრძნობდნენ შენს მზერას ქალო,
მარჯვენას საქმროს გამოატანდნენ,
რომ სიბრალულით შეგევლო თვალი
და საიდუმლოდ რჩებოდა კოშკებს
უცნობი ქისტის მოჭრილი მკლავი...

დღეს მეც დამჭერი იმავ თვალებით,
თუმცა არა ვარ ვფიცავ ურჯულო,
ბილიკს აჰყევი და ნაკვალევი
გულზე დამადე,როგორც ურდული!!!

ალბათ მარჯვენას მე არ მომკვეთენ,
არც ცხენის ძუას გამომაბამენ,
მაგრამ იცოდე არ ვარ მოკეთე,
ან მკლავი მომჭერ,ან გამათავე...




№№№

ხევსური არ ვარ დედით და მამით,
მაგრამ მთებით ვარ წმინდა ხევსური,
მაპკურე ცვარი შენი მთა-ბარის,
გაიერთგულე სული მწყემსური...

ჩამომაგლიჯე მკერდზე საკინძე,
უსმინე გული,როგორ ხმაურობს,
ვეფხვებთან შებმა ერთხელ მაღირსე,
ერთხელ გამხადე ზვიადაური,


რომ დაფლეთილი მნახონ ყორნებმა
და მიხვდნენ ვაჟი ვარ სადაური...