ქვემოთ მოყვანილია პრეპარატები, რომლებსაც აფთიაქში ვერ წავაწყდებით, მაგრამ ისინი ფართოდ გამოყენებადია საზოგადოებაში.

1. სექსი (ფასი: -500$-დან 500$-მდე)

გამოიყენება ღრმა დეპრესიისა და მძიმე სტრესის მოსახსნელად. ხსნის მოუსვენრობას. იწვევს წონაში დაკლებას, რამდენიმე გრამით - მყისიერად, ხოლო თვალსაჩინო შედეგს გვაძლევს რეგულარულად გამოყენების შემთხვევაში. მაღალეფექტურობისათვის მიზანშეწონილია პრეპარატი მიიღოთ სასურველ ადამიანთან ერთად. 

დოზირება - რაც მეტი მით უკეთესი.

გვერდითი მოვლენები -  ჩქმეტა, პორჭყვნა, სრესვა და სხვა 2-ზე ნაკლები ან ტოლი მარცვლიანი სიტყვები.

უკუჩვენება – ნაადრევი ორსულობა.

შენიშვნა: პრეპარატის მიღება არასასურველია მარტო ყოფნის დროს. თუ ამას მაინც გადაწყვეტთ, დარწმუნდით, რომ ნამდვილად მარტო ხართ. 


2. სიგარეტი (ფასი: “სპასიბა ბრატ”-დან 10 ლარი+ხურდა დაიტოვე-მდე)

გამოიყენება საჩვენებელი და შუა თითის განსაცალკევებლად.

დოზირება – რაც მეტი მით უარესი.

გვერდითი მოვლენები - არამწეველთა უკმაყოფილება.

უკუჩვენება – კბილებისა და თითების გაყვითლება, მარჯვენა და მარცხენა ფილტვების გაშავება, სახის ნაკვთების გაუფერულება.

შენახვის წესი - პრეპარატი ინახება სპეციალურ კოლოფში.


3. ღვინო (ფასი: შეუფასებელი)

გამოიყენება გულიდან ნაღველის გასაფანტად. მიიღება სხვადასხვა მოცულობის ჭიქით, ფიალით, ყანწით, ჭინჭილით, დოქით, ძაბრით, კრამიტით, თოფით, ხორცის მანქანით, ლამფის შუშით, გატეხილი ნათურით, სოსკაწამოცმული ბოთლით, ფეხსაცმლით ან ასე შემდეგ. იწვევს პრეპარატი №1-ის მიღების მოთხოვნილებას და ართულებს მის მიღებას (აქ გაითვალისწინეთ პრეპარატი №1-ის შენიშვნა).

დოზირება - ნუ დალევთ ბოლო ჭიქას.

გვერდითი მოვლენები - დუდუკი, ქალები.

უკუჩვენება - დოზირების გათვალისწინების შემთხვევაში უკუჩვენება არ აქვს.

შენახვის წესი - ნუ გააჩერებთ ჭიქაში დიდ ხანს (დაასხი?! დალიე!).


4. დუდუკი (ფასი: 0)
გამოყენება - 0.
დოზირება - 0.
გვერდითი მოვლენები - 0.
უკუჩვენება - 0.


5. ტელევიზორი (ფასი: ასი ასირიული ასირი)

გამოყენება ანტენის შერჭობის ჟინის მოსაკლავად. ასევე, გართობის მიზნით, სხვადასხვა არხების საყურებლად.

დოზირება - დღე-ღამეში მაქსიმუმ 24 სთ.

გვერდითი მოვლენები - ადგილი აქვს მხოლოდ მაშინ, როცა ანტენის შერჭობის ჟინის მოკვლისას, ანტენას პრეპარატის ნაცვლად შევარჭობთ მის გვერდით მდგომ პიროვნებას.

უკუჩვენება - აქვს მხოლოდ მაშინ, როცა პრეპარატი შებრუნებულია.