მსუნაგი


საქათმეში შეასწრო
მელაკუდას მურიამ.
მელამ თავი იმართლა:
თქვენი შველა მწყურია!!
ტყეში ყური მოვკარი–
ავად არის მამალი,
ჰოდა, მოვუცუნცულე
უებარი წამალი!!
შეუღრინა მურიამ:
არ გაგივა ფანდები!!
კარგად ვიცი, მსუნაგო,
რა ექიმიც ბრძანდები!!
   
    *  *  *
  ფისოს ჩივილი


განა შეჭმა მინდოდა..
დამახიეს ყურები..
დავიტანჯე თევზების
ტყვეობაში ყურებით.
ჰოდა, აკვარიუმიც
მიტომ დავაპირქვავე.
მე ნამდვილი გმირი ვარ!
ესენი კი მირტყავენ!!


    *  *  *

კერკეტა და მაგარი
თაგვმა ნახა კაკალი.
ყვავმა უთხრა:ნიძლავი,
ვერ გატეხავ მაგასო,
თუნდ ეგ შენი კბილები
ათასჯერაც ჩაასო!!
ჰოდა, ყლაპა ნერწყვები,
როცა მარჯვე თაგუნამ
გემრიელი ლებნები
მისწინ ჩაახრამუნა!!



    *  *  *

ოქროს დეზებიანი,
ამაყი და თამამი
შემომჯდარი ღობეზე
რაზე ყივის მამალი?
იმაზე , რომ გათენდა
უკვე კარგა ხანია,
შენ კი პირი აქამდე
ჯერ არ დაგიბანია!!

 
*  *  *


ასე უცებ  შეჭამე
ბუტერბროდი, ნათია?
თუ ჩიტების საკენკად
ჩვენს რაფაზე აგდია?
კი, ბებვიკო, შევჭამე,
ჩავიკვნიტე თითები.
მარტო ბოლო ლუკმაზე
მოვიხმარე ჩიტები.