ვცდილობ გავცილდე ბინდიან ბექობს,
ფითრდება ფიქრი...
                            შორს დგანან მთები,
ჩემს ირგვლივ ისევ დუმილი მეფობს,
დუმილში დნება დრო დანანებით.
დუმილი ლამბავს მდუმარე ლანდებს
და ღამეებში მიჰყავს გუნდებად,
დუმილი დუმილს აქრობს და ბადებს,
დუმილი დუმილს ესაუბრება.
დუმილში წვება მთები და ველი,
დუმილში... ისმის ხმაური გულის
და გული ელის,
                        ყოველ წამს ელის,
თუ ვინ დაარღვევს ამ უძრავ დუმილს...