მიყვარს და მძულს კიდეც ჩემი პოეზია,
რითმიან სიტყვების ხოხვა - რახარუხი...
მეფეს სხვა რითმები უნდა მოეძია,
მაგრამ ვერ იპოვა ჩოხა - ახალუხი.

მიყვარს და მძულს კიდეც ჩემი სიმარტოვე,
რითმიან სიტყვების უაზრო თამაში...
დო,რე,მი,ფა,სოლ,ლა,სი მათოვე,
რომ მეც დავიკარგო ბგერათა გამაში!

მიყვარს და მძულს კიდეც ჩემი ამანათი,
მსურდა,რომ რითმები სხვისიც მომესმინა,
ხალხი მაძღარია ციურ მანანათი,
ხოლო დაბერებულს უცდის მოსეს სინა.

მიყვარს და მძულს კიდეც ვნების კომიტეტი,
ღამის სამ საათზე გრძნეული თამბაქო
და გთხოვთ,მომიტევოთ და გთხოვთ,მომიტევოთ,
არ ვარ რაიკომის მდივანი ამბაკო.

მიყვარს და მძულს კიდეც პეპლის ფარვანობა,
ჩემი და რონინის უხმო სუიციდი...
მხოლოდ მენავესთან გათქვა ფარაონმა,
რომ სარკოფაგიდან მისთვის სულ იცდიდი.

მიყვარს და მძულს კიდეც ჩემი პოეზია,
რითმიან სიტყვების ხოხვა - რახარუხი...
მეფეს სხვა რითმები უნდა მოეძია,
მაგრამ ვერ იპოვა ჩოხა - ახალუხი.