ა–მაოება და წარმავლობა მისაღებ ოთახში ყავას შეექცეოდნენ.
ბ–რაზი ბოღმის წიაღში მედიდურობდა.
გ–უმანი წარუმატებლობისგან ეჭვიანობდა.
დ–იდება, ბექობზე შემდგარი, კაცობრიობას საზრუნავით ხუნძლავდა.
ე–გოიზმი საკუთარ ინტერესებს სხვებზე მაღლა აყენებდა.
ვ–ნება შიშველი დაარბენინებდა ტკბილეულს და მანკიერებისგან ეწვოდა სხეული.
ზ–იზღი ტუჩაბზუებულ მეძავსავით  მსხვერპლს ზვერავდა.
თ–ვალთმაქცობა საჯარო მოხსენებას აკეთებდა ,,მორალზე“.
ი–დუმალება ილუზიონისტობდა.
კ–მაყოფილება სტომაქზე ხელიხელგადაჭდობილი მშვიდ მიმიკებს იყენებდა.
ლ–ანძღვა  ლოთივით უმისამართოდ პენტავდა ბინძურ ლექსიკას.
მ–არტოობა საქსოვ დაზგასთან მიყუდებული ჩხირებითა და ძაფებით იოკებდა ნერვებს.
ნ–დობა მთვარეულით დასნეულებული ტაძრის ფილაქანზე ესვენა.
ო–ცნება მატარებლის ბაქანთან უანგაროდ არიგებდა ბილეთებს.
პ–რანჭვა სარკის წინ იდგა და თმებს ივარცხნიდა.
ჟ–ინი ლომბარდიდან ცდილობდა პროცენტიანი სარგებლის მიღებას.
რ–წმენა ლატარიის ბილეთის მსგავსად მცირე ტირაჟით იბეჭდებოდა.
ს–იძუნწე ჯიბეგაფხეკილ მათხოვარსავით გამუდმებით ხურდა ფულს ითვლიდა.
ტ–კივილი ექიმისგან გამოწერილ ტაბლეტებს  მოუთმენლად ჰყლაპავდა.
უ–კეთურება ავკაცობდა, რადგან სხვაგვარად ცხოვრება გენეტიკურ კოდში არ ეწერა.
ფ–არისევლობა იცინოდა, ოღონდ არ იცოდა რისთვის.
ქ–ედმაღლობა ქვემძრომლურად ქარაფშუტობდა.
ღ–ვარძლი იფლის შემხედვარე იზაფრებოდა. 
ყ–ვირილი უკვე აღარ აპირებდა პირში წყლის დაგუბებას.
შ–ურისძიება მხოლოდ მიზეზს დაეძებდა, არ კითხულობდა რისთვის!!!
ჩ–ივილი ჭორიკნობისას სათქმელს აყრანტალებდა.
ც–დუნება გარყვნილთა მანკიერ შეგონებებს სხეულზე ისრესდა.
ძ–რწოლას შავი გრიმით შეღებილი სახე გამოეჩინა.
წ–არმავლობას ადამიანთან ბანქოს თამაშისას ფსონად დადებული სიცოცხლე მიეთვისებინა.
ჭ–ეშმარიტება სიმართლის მტვირთველობისთვის  მეზობლებს ანბანიდან მოეკვეთათ.
ხ–ვეწნა ამ ერთხელაც უბილეთოდ მგზავრობის დაშვებას გარდაუვლად მიიჩნევდა.
ჯ–ავრი სხვათა უსახურობას განიცდიდა.
ჰ– აეს ერთადერთი სასჯელი კი დასასრული იყო...