მე მოგიგროვებ წვიმის წვეთებს,

რომ არ გამოშრე.

ავეფარები ათას ტყვიას,

შენთვის გამიზნულს.

თუ მაინც წახვალ ავიჩემებ

ჩუმ,მყუდრო  კაფეს,

მზერას გავითბობ ცხელი ჩაით,

შენით გაყინულს.



მე ამოგიწერ მოტკბო სიტყვებს,

მწარე ფიქრისთვის,

მევე გაგიწმენდ ჩემი ხელით,

დამტვერილ ფანჯრებს,

თვალს,რომ გაახელ მოგეკოცნოს

ისევ მზის სხივი,

რომ უფრო მშვიდად მოეფერო

შენ ლამაზ ბავშვებს.



მე დაგიტოვებ ყოველ დილით

კართან გვირილებს,

მე დაგიტოვებ თუ დაგჭირდა

წამალს,ტკივილის.



...და ჩემი ქმარი სახლში ხვალაც,

ზეგაც მიმიღებს,

და ჩემი ქმარი ხვალაც,

ზეგაც ყვავილს მიყიდის.

ის მომიგროვებს მოტკბო სიტყვებს,

მწარე ფიქრისთვის,

ისვე გამიწმენდს

თავის ხელით,

დამტვერილ ფანჯრებს,

თვალს,რომ გავახელ

მომეკოცნოს ისევ მზის სხივი,

რომ უფრო მშვიდად მოვეფერო

ჩვენ ლამაზ ბავშვებს.



...მე დაგიტოვებ ყოველ დილით

კართან გვირილებს...