უსურვილობამ თოკი დაკიდა,
ყულფში წამეყო თავი ეგება.
რა გულგრილი აქვს სახე საკიდარს,
როცა ქანაობს თოკზე ფეხები...
გადავაგორე ფიქრში ეს კადრი,
ავისმთქმელი და წერტილდამსმელი.
ჩემი ფიქრები იმ ტიტრებს ჰგავდნენ ,
ფილმის დასასრულს ფილმს რომ გახსენებს...
თავის ადგილზე კვლავ დგას მაგიდა,
და საკიდარსაც პალტო აცვია.
აკეთებ იმას, რაც სულ არ გინდა,
ყოფა ჰგავს ყოფნის პროვოკაციას...
როცა აღარ მსურს, დასასრულია,
უყველაფრობამ ჩამფლა ყელამდე.
სურვილები კი სუფთა სულს ღვრიან
და დაუწერელ ლექსს წუხს მელანი...
მაგიდა, ლამფა, ისევ მაგიდა,
ფიქრი ისეთი, წყალს რომ მიჰქონდეს...
”ო, რომ იცოდეთ, როგორ ნაგვიდან,
იშვება ხოლმე კარგი სტრიქონი...”

            16.11.10

არაპოპულარული პოპური

"ალხო-მალხო, ჩიტმა გნახოს",
დადის თავბრუ ახლო-მახლოს.
"აბდა-უბდა, გადასკუპდა",
ჩემი ნატვრა თავს მოუკვდა.
"ბუხტარ-ბუხტარ, კამერ-კუმან".
ხსოვნის კართან წლები სდუმან.
"ალისასა, მალისასა",
ის დამწამეს, ვებრძვი რასაც...
"გულო, მოდი საგულესა",
თვალწასულ წლებს დრო მიკემსავს.
"თეთრი ქორი აქანასა",
არ გავყვები ქარს აღარსად...
"არული, კუდიანს, არული",
იმდენი მტერი მყავს ფარული...

"ალიხე, მალიხე, სალიხე"
ლოცვები სასთუმალს დამისხდნენ...
          10.10.09