ხოლო მე გეუბნებით თქვენ: ყველამ, ვინც
                                                                  ნდომით შეხედა ქალს, უკვე იმრუშა მასთან
                                                                  საკუთარ გულში.

                                                                                                                მათე 5.28


                                                                  არასდროს შემხვედრია ქალი, რომლისგან
                                                                  შვილები მესურვოს, გარდა ერთი ქალისა,
                                                                  რომელიც მიყვარს: რამეთუ შენ მიყვარხარ,
                                                                  ჰე მარადისობა!

                                                                                                        ფრიდრიხ ნიცშე







          ორ წერტილზე შეიძლება ავაგოთ მონაკვეთი. ამ მონაკვეთის ნებისმიერი წერტილი იქნება ის ადგილი, საიდანაც ჩანს ეს მონაკვეთი, ანუ ნებისმიერი წერტილი სხვა არაფერია, თუ არა ამ მონაკვეთის წერტილი, - წერტილი საიდანაც ამ მონაკვეთთან შეხება ხდება. ეს კალამი ეხება ფურცელს და ამ შეხების ადგილიდან ჩანს მთელი სათქმელი, როგორც მანძილი ორ ეპიგრაფს შორის. დაწერილი ტექსტი, თავად წერის პროცესი და ის რაც შეიძლება დაიწეროს(როგორც შესაძლებლობა) აქ, ამ ფურცელზე, და ისიც, რასაც ვერ დაწერ, რადგან მის უბიწოებას მხოლოდ ფურცელის სითეთრე შეესატყვისება, - ყველაფერი ეს ეკუთვნის ამ მონაკვეთს, ამ ფურცელს, ამ ადგილს. დრო დგას, როგორც ადგილის ანარეკლი. იცვლება ადგილი და იცვლება ანარეკლი და მოჩანს დრო როგორც მოძრაობა ერთისა მეორისკენ, იმის დავიწყებით რომ ერთიცა და მეორეც, - ერთშია. ერთში არ არის მოძრაობა, ერთში ხდება გადანაცვლება და ეს გადანაცვლება თავად არის ერთი მთლიანობა. თვით ცვლილება არის ადგილი. დრო დგას ცვლილების ადგილზე, როგორც ლამაზი ქალი სარკის წინაშე, ოღონდ განსხვავებით ქალისგან, იგი არ კარგავს თავის სილამაზეს, არ ბერდება და არ კვდება. შეუძლებელია დაიწეროს გაზაფხულის ისტორია, გაზაფხული დგას, ან არის, ან არ არის, მაგრამ მაშინაც კი როცა იგი არ არის, გაზაფხული მაინც დგას როგორც შესაძლებლობა მისი დადგომისა.