მე ვარ მე.
მე გამოცდილი კაცი ვარ.
რას ვგულისხმობ? – ახლავე გეტყვით!
ყველაფერი მინახავს ცხოვრებაში, ყველაფერი (გამო)მიცდია და (გან)მიცდია, ყველას ცხოვრებით მიცხოვრია დაა ასე,შემდეგ და შემდეგ:
ჩხუბით სახეც დამიზელია სხვისთვის; ზოგიერთ სხვას კი – ჩემთვის.
ფეხშიშველს მივლია, მზისფერ ქვიშაშიც და ცისფერ ყინულზეც.
წყალი დამილევია – ტალახიანი.
საჭმელი მიჭამია – მიწიანი.
ლურსმანი მიგემია – ფეხის გულით.
ბორკილი მიგემია – მაჯით. მაჯით საათიც მიგემია,მაგრამ ბორკილს სულ სხვა გემო ჰქონდა.
მანქანა მიტარებია – სამი ბორბლით.
სამი ნეკროლოგი წავიკითხე – სამივე ჩემი.
თუმცა დღეს აქ ვარ და ჩემი ამბის მოყოლას ვაგრძელებ.
ზღვაშიც ვცურავდი – ყინულიანში.
მაგიდაზეც მიცეკვია და ნახევრად დანგრეულ ხიდზეც;
მაშინ, სასმელმა რომ გამაგიჟა...
სასმელსაც გავუგიჟებივარ და სიყვარულსაც...სიყვარულს – უფრო.
ბალიშიც დამისველებია – ცრემლით.
ღამე მითენებია – ფურცლით და კალმით და მისი სახით.
ციდან ღრუბელიც მომიწყვეტია – ოცნებით.
დიდი ბრბო გამიჭრია – გრძნობებით.
მიამიტიც ვყოფილვარ – ადრე...შორს...ძალიან შორს...
ობლის სტატუსიც მოვირგე,მერე ქვრივისაც და ცოტა მოგვიანებით – შვილდაღუპულისაც...
მეფეც ვყოფილვარ და მონაც.
ტკბილიც მიგემია და მწარეც.
დიდი წრე მოვხაზე,რომლის დიამეტრი დედამიწის დიამეტრის სიგრძის ტოლია…
იმათ კი, იმათ რომ კითხო, გაუნათლებელი კაცი ვარ. რატომ? – ჩემი თვალი და გონება არ შეხებია იმ წიგნებს,რომლებსაც მათი შეხებია.თუმცა,შემიძლია დარწმუნებით ვთქვა – მე უფრო დიდი წიგნი მაქვს წაკითხული.
ისინი ნიღბიანები არიან,ჩემოდნიანები და წიგნებიანები. კიდევ – ფულიანები და „იანები“... ბევრი, ბევრი „იანები“. ისინი განათლებულები არიან. ხოლო მე...მე გაუნათლებელი ვარ მათთვის.ჩემი კითხვის ობიექტი სარეკლამო აბრებსა და შემთხვევით ხელში მოხვედრილ გაზეთს არ გაცდენია.მერე რა – მე არ ვდარდობ.მეტისმეტად ბევრი რამ მაქვს გადატანილი და წაკითხული(ცხოვრების ფურცლებზე), იმისთვის,რომ ამაზე ვიდარდო... თუმცა, არც იმით დამაკლდება რამე, ორივე რომ მომარგონ: „გაუნათლებელ–განათლებული“ – არ ვგრძნობ თავს ცუდად... მე სხვანაირად ვარ განათლებული… და საერთოდ: მინდა სიტყვა „განათლებული“–ს ახალი განმარტება შემოგთავაზოთ: „განათლებული – გონებაგანათებული, ცხოვრებით განათლებული, რომელიც მის მთავარ აზრს ჩაწვდა...აქ  შესასწავლი საკითხებია მისი გამოცანები,თავსატეხები და ძირითადი კანონები,რომლებიც არ იცვლება,თუნდაც პირველი საუკუნე იყოს, თუნდაც – ოცდამეერთე.ხო, და კიდევ - შესასწავლ საკითხებში ასევე შედის ბევრი,ბეევრი მოულოდნელობა“.
ეს მე ვარ - ადამიანი საადამიანეთში...გაუნათლებლად განათლებული...