ბინდდება სოფელი,
ვარსკვლავნიც შობილან...
სული სულ შიშველი
მშთა, დედიშობილა...
ფიქრნი იცვლებიან,
დარდად იცლებიან,
გარდაიცვლებიან,
ვით არც კი ყოფილან...
შენთან ვარ გონებით,
შენის შთაგონებით...
და ეს სტრიქონებიც
ფიქრთ ქროლვად მოფრინავს...
ეს წუთისოფელი
ძნელი რამ ყოფილა,
თუმც ეს სამყოფელიც
თვით ღვთისგან შობილა;
დგახარ თუ დადიხარ,
ვიღაცის ლანდი ხარ...
ვიღაცის ლანდი ხარ,_
ვიღაცის ოცნება...
ჭაღარა მატულობს,
იმედი ცოცხლობს,
ნათელი დღე კი ღამით იცვლება...
ბინდდება სოფელი_
წუთი სამყოფელი,
დავალ სულშიშველი,
ვარ საწყალობელი...
უფალო შემიწყალე!
უფალო შემიწყალე!
უფალო შემიწყალე,
სევდის მგალობელი!..