"ფეხები მიადგი ლამაზო ერთმანეთს
                                                              კაბის ქვეშ გიყურებს მთელი დედამიწა"
                                                                                                        გ.ზანგური

სხეული დამალე,დამალე შიშველი სხეული,
კაბის ქვეშ გიძვრება თვალებით მაცდური სამყარო,
ქარი კი ეხვევა შენს მუხლებს და თმათა ხვეულებს,
ჩემი სიყვარული პლანეტის ღერძივით მყარია.

სულ გეძებ და გელი,არ დამღლის მე შენი ლოდინი
და ყველა ქალწული შენს ხიბლს და შენს სურნელს ატარებს,
და როგორც კალმახი,მივყვები ჩანჩქერის დინებას
შენი თმის,ამ მზერით აღმა და ზეცაა პატარა,

რომელიც ამ წუთას უბრალოდ თვალებში ჩავტიეთ,
ზეცამაც უბრალოდ ჩვენ ორნი თვალებში ჩაგვტია,
ჩემიდან შენამდე მცირე და უსაზღვრო ტირეა,
უსაზღვრო ტირეა,ფიქრები იმსხვრევა ტიალი...

ჩემი სიყვარული პლანეტის ღერძივით მყარია,
მე ვეტრფი შენს თვალთა ხან მწუხრებს და ხანაც აისებს,
გავხსენი მაგ კაბის საკინძე და გულის კარები
ამ მზერით და ყვავის თეთრად და ვარდისფრად მაისი

კაბის ქვეშ,მე კი გთხოვ დამალო შიშველი სხეული,
რადგანაც მაცდური სამყარო გიძვრება თვალებით,
ქარი კი ეხვევა შენს მუხლებს და თმათა ხვეულებს
ეხვევა ქარი და ვნებით გათანგული მთვრალია.


მე ახლა მაღლა ვარ შენ ახლა უფრო ხარ მაღალი,
ღვთაება,ან იქნებ სამყაროს მპყრობელი ქალღმერთი,
თვალების მღვიმეში ოცნების ვარსკვლავი ღაღანებს,
როცა შენ ერთი ხარ,სხვა ყველა მერწმუნე ერთია.
                                              დმ.14.06.2011წ.