ისე მძულხარ როგორც არწივს მთები,
ისე მძულხარ როგორც მგზავრებს გზები.
ისე მძულხარ როგორც ვაჟს სძულს ქალი,
ისე მძულხარ როგორც თევზს სძულს წყალი.
ისე მძულხარ როგორც წუთებს წამი,
ისე მძულხარ როგორც კუბოს გვამი.
ისე მძულხარ როგორც ბუხარს ცეცხლი,
ისე მძულხარ ვით იუდას ვერცხლი.
ისე მძულხარ როგორც აპრილს მარტი,
ისე მძულხარ როგორც სანთელს ხატი.
ისე მძულხარ როგორც ქუჩას ტერფები,
ისე მძულხარ როგორც გუმბათს კედლები.
ისე მძულხარ როგორც ტყვიას დენთი,
ისე მძულხარ როგორც მრევლს სძულს ღმერთი.
ისე მძულხარ როგორც ნამუსს ულვაში,
ისე მძულხარ როგორც ტილოს გუაში.
ისე მძულხარ როგორც ზეცას ნიბლია,
ისე მძულხარ როგორც მღვდელს სძულს ბიბლია.
ისე მძულხარ როგორც სტროფებს რვეული,
ისე მძულხარ როგორც სულს სძულს სხეული.
ისე მძულხარ როგორც ფილტვებს ნაფაზი,
ისე მძულხარ ვით მათხოვარს აბაზი.
ისე მძულხარ როგორც აღმართს დაღმართი,
ისე მძულხარ როგორც მელანს ქაღალდი.
ისე მძულხარ როგორც პოეტს ლექსები,
ისე როგორც მატარებელს რელსები.
ისე მძულხარ როგორც ურსას ქარქაში,
ისე მძულხარ როგორც თოვა ზამთარში.
ისე მძულხარ როგორც ლოთებს ღვინო,
მძულხარ როგორც თითებს პიანინო.
ისე მძულხარ როგორც ნაგანს ტყვია,
ჩემს სიძულვილს სიყვარული ქვია.