წითელი გარშემო, მრავალი წითელი!
სისხლისფრად ვმრისხანებთ წითელი თვალებით!
მწვანე გზას მეწამულ ფეხისქვეშ გითელავ
და წითელ შუქნიშნებს ვერსად ემალები...

წითელ დროს,
ვერას-დროს
დაიწყებ ნულიდან
და ყურებს
დაჰ-ყურებს
სიწითლე ხმაურად,
წითელი სხივებით ივსება გული და
მზეს სილას გააწნავს წითელი აურა

და ყველა სხვა ფერი
ქვაფენილს
მიჰყვება...
ღიმილსაც გარშემო წითელი არტყია,
ამ ცეცხლს კი - სისხლისფრად გასროლილს სიტყვებად,
შთანთქავს სიმარტოვე,
დაგტოვებ
და ტყვია

დაამსხვრევს ნარჩენი გრძნობების ნაკვალევს,
ჩამოვყრი ვარსკვლავებს წითელი საფანტით...
სიყვარულს აებნა ღამეში გზაკვალი
და ყველა ოცნება ქვესკნელში გაფანტა

უღმერთოდ
ვაღმერთებ
მოწამლულ მეწამულს,
განაჩენს ნარჩენი სინდისის წვით ელი...
ჩემ ფერხთქვეშ სისხლისფერ სიწითლედ ეწამე!
წითელი მრავალი, მრისხანე წითელი!!!