ღმერთო, მომეცი იმდენი ფული
სატანამ აქეთ მომყიდოს სული
მე ყველა კეთილ საქმეს ვუთავებ
თუ დოლარებად დამიხურდავებ.

ღმერთო, მომეცი ისეთი ქალი
სხვის ცოლზე რომ არ გამექცეს თვალი
ისე მათბობდეს, როგორც ღუმელი
ლამაზი იყოს, თუნდაც სულელი.

ღმერთო, მომეცი სიმშვიდის დღენი
რაღაცას რომ არ ვდიო ტყე-ღრენი
ექვსი მანქანა, ოთხი სახლ-კარი
შენი სამოთხის იყოს მაგვარი.

ღმერთო, მომეცი სული მზაკვარი
აქ უფრო კარგად ცხოვრობს ახვარი
ვინც წუწკია და დაუნდობელი
მას უფრო სწყალობს წუთისოფელი.

ღმერთო, მომეცი სიბრმავე გონის
შტერია უფრო კარგად, მე მგონი
რად მინდა ფიქრის ჯაჭვთა გადაბმა
მინდა ასოებს ვსდევდე ქარაგმად.

ღმერთო, მომეცი ვირის მოთმენა
ამდენ სულელს რომ ვეყო მოსმენად
და ორი ყური მჭირდება კიდევ
ჰაერს არ ჰქონდეს საითმე კიდე.

ღმერთო, მომეცი ორპირი ენა
არავის რომ არ მიადგეს წყენა
ერთთან ერთს ვიტყვი, სხვასთან-მეორეს,
იგივეს არას გავიმეორებ.

ღმერთო მასწავლე სხვისი მხილება
ზურგსუკან დარტყმის გამოცდილება
სხვისას რომ ვდევდე შეცდომას მცირედს
საკუთარ თვალში ვმალავდე დირეს.

ღმერთო, მომეცი იმის მხნეობა
შიგნით მოვახრჩო ჩემი ზნეობა
მერე ვიქნები ყველაზე კარგად
აი, ასეთი ცხოვრება ვარგა.