მივყვები თოვლში სევდის ნაფეხურებს,
მეხვევა ფიფქები და ფიქრთა ხუნდები,
ვიხსენებ ცხოვრების განვლილ საფეხურებს,
წარსულო,დაგტოვე,ვერ დაგიბრუნდები!

ჩემი თვალების ცისფერო აპრილო,
ჩვენს შორის ჯიუტად ჩამდგარა ზამთარი,
დარჩა უსახო და უადგილო
ატმის ყვავილთა ტკბილი ზღაპარი

აივსო დღეები უღონო რითმებით
წამოდი,ცრემლო,არ დაიგვიანო!
მზის პოეზიას ცივი თითებით
უკრავს ქუჩაში ფორტეპიანო

მივყვები თოვლში სევდის ნაფეხურებს,
მეხვევა ფიფქები და ფიქრთა ხუნდები,
ვემშვიდობები განვლილ საფეხურებს,
წარსულო,დაგტოვე,ვერ დაგიბრუნდები!