ხტიან თავთავები ქრისენსე-
სოფელია ცხელი
სავალია ბევრი-
ვარდისფერი ქუსლები დაგესვრება
მუხლებს ამოყევი ქრისენსე
ილოცე ჯვარდაწერილო!
-ჩაწექი გუდრონში ქრისენსე
როდის ვუცადო შემოდგომას
გაიხსენე ოაზისები და დაბმული თევზები-
კაცისთვალება
შენი არც ერთია
გაიხსენე ფანჯრიანი შენი უბე ქრისენსე
და შეუმდგარი სალოცავები
გაიხსენე
პირჩაჭრილი თოჯინები ქრისენსე- შენ რომ ხარ მაინც
ღრმა ჭრილობებით
მუცელში რძეჩაღვრილო
-დაგლევ მაინც ქრისენსე-იქედან
ამინდის ქალო
თვის ქალო
დღის ქალო
გიხდებოდა გუდრონის ხაზები ტანზე
გიხდებოდა უძუძუობა
ნიჟარიდან გადმოღვრილო...
-სად ხარ ქრისენსე!
სად აშენებ ბუდეს კოვზებით
ჩამომესხი უჯრებად
ფეხებში გამეპარე ლურჯად
გაქცეულო
-სად მიდიხარ ქრისენსე
ვინ გიჭედებს იატაკს და გიხსნის პირს
ვინაა შენი მეუღლე
ბამბებში ჩაგაწვინო ქრისენსე
არ უნდა მოგეკარო
ახალი თვე მოდის -გაიხარე
გახეთქე ინდაურის ჩიყვები!-არ გეტკინება
მგლები გადავყლაპე შენი- მგლები ქრისენსე
-უმტროდ გტოვებ და მივდივარ!