აღდგომა მოდის,
მოვემზადოთ,
გადავივარცხნოთ შერჩენილი თავზე ბუსუსი
- სად დამეკარგა ვერცხლის სარჭი, ჩამატანეს, მგონი წლების წინ...
- გახამებული ცხვირსახოცი, ცოლო, სად არის? ჰო, გამახსენდა, შავი პიჯაკის გულის ჯიბეში
- ეს ფეხსაცმელი დაიმტვერა, ვინ იცის, იქნებ მოდიდანაც კი გადავიდა.
- მტვერს რაღას დარდობ, მე ფეხსაცმელი შემიჭამეს თეთრმა მატლებმა.
- აი იმას, ჰალსტუხს რომ იკრავს, მდიდარმა შვილმა გამოატანა ორი წყვილი მოკასინები, იქნებ  სააღდგომოდ ერთი გათხოვოს?..
- რა საწყენია, ღმერთო ჩემო, სულ დაფლეთილა მაქმანიანი ჩემი საცვალი, ხავერდის კაბა დაუჭრია უსინათლო მღრღნელების ოჯახს...
- გოგონი იქნებ დამეხმარო, კამეას ბროშში გამიცვალო შენი ჯინსები...
აღდგომა მოდის
ქუსლი მოსძვრა სამოცი წლის წინ ნაყიდ რძისფერ ფეხსაცმელს
კუბოკრული ZARA-ს პერანგი შემოადნა მეზობელი საფლავიდან ქერა ქალბატონს
ორმოცი წლის წინ მიპკურებული ”Красная Москва” აუორთქლდა მოხუცს კისრიდან
სამაგიეროდ აი იმ გოგოს ისევ დაჰკრავს VERSACE- ს სუნი...
აღდგომა მოდის
მოვემზადოთ
გადავიცალოთ ზედ მოყრილი მიწა-ბალახი
გადავივარცხნოთ შერჩენილი თავზე ბუსუსი
სტუმრები მოვლენ
მოგვიტანენ ძღვნად წითელ კვერცხებს
ქიშმიშიან პასკებს, კიდევ ღვინოსაც
აღდგომა მოდის
იქნებ ვინმეს გაახსენდეს, რომ ჩემი კაბა გახუნდა, დადნა
რომ აი, მისი ცხვირსახოცი დიდი ხნის წინ მიწამ შეჭამა
ჰალსტუხის კვანძი დაიშალა, მგონი გუშინ წინ
აღდგომა მოდის
რა უჭირს ქრისტეს
მისი პერანგი მოდიდან ხომ არასდროს გავა...