შემოვიჩვიე საღამოს ძილი,
ისე ვიღლები.
ღამით ვიღვიძებ (ასე თორმეტზე),
მერე კი ვათევ...
ვარ რაღაც შარში თავგაყოფილი,
თან ბედნიერი(?..).
დღის ცეცხლს ვიპარავ როგორც პრომეთე,
ღამით რომ გავთბე.

პატარ-პატარა მზეებს ვიპარავ
(გითხარი უკვე).
უკუნეთში რომ გზა გამინათოს
ვაწყობ გარითმვით
კონსტიტუციას, როგორც მიქარვას -
თუ გამებუტე;
შენს მოსაძებნად ახალს ვქმნი ჯადოს -
ჯადოქარივით.

ლექსსაც არ ესმის აბრა-კადაბრა -
ჩემი მაგიის,
შენ რა მოგთხოვო?.. სად გაგაჩინო?..
ცილინდრს კურდღელი
ვერ მოვაშორე და გათამამდა -
ლექსშიც დამცინის,
ვით გამოუცდელ უმცროს პარტნიორს
და გეუბნები:

შემოვიჩვიე საღამოს ძილი,
ისე ვიღლები.
ღამით ვიღვიძებ (ასე თორმეტზე),
მერე კი ვათევ...
ვარ რაღაც შარში თავგაყოფილი,
თან ბედნიერი(?..).
დღის ცეცხლს ვიპარავ როგორც პრომეთე,
ღამით რომ გავთბე.