თხემის ადგილისკენ*, კრავივით მორჩილი,
აღმართს მიუყვები მძიმე ნაბიჯებით,
ბაგაში შობილი უპოვარი ჩვილი,
მეფობის ბრალდებით მკაცრად დაისჯები.

მკაცრად დაისჯები, მე რომ არ გიწამე
და შენს განაჩენზე დავხუჭე თვალები,
ვერცხლის სიყვარულით მე რომ მოვიწამლე,
ჯვარზე უდრტვინველად მისთვის ემსჭვალები.

აწი რომც არ აღსდგე და რომც არ ამაღლდე,
უკვე აღასრულე შენი სიყვარული,
მე, ის დამრჩენია, მეორედ მოსვლამდე
თავი ვინუგეშო გლოვა-სინანულით!

*თხემის ადგილი - გოლგოთა