როცა სათქმელი გათავდება, თითქოს არ დარჩა,
მაშინ იწყება დუმილი და ფიქრის ცუნამი,
და ბოლოს, როცა დაიქუხებს შუბლთან დამბაჩა,
უცებ დაასკვნი, რომ სათქმელი თურმე სულ არი.

უცებ დაასკვნი, რომ არ თქმულა თურმე აქამდე
იმ შენს გრძნობაზე, სათუთად რომ გულში მალავდი,
რა სიყვარული, -ეს სხვაა და გულის დაფაზე
სულ სხვა სიტყვებით იბეჭდება შენი ამბავი.

ასე გგონია, შენ პირველმა დაიწყე ფიქრი,
ასე გგონია, შენ პირველი ხარ უბედური,
არადა, უკვე ასგზის ნათეს მოსავალს იმკი,
და არც სულ ბოლოს გაგბზარვია უბეში გული.

როცა სათქმელი გათავდება, თითქოს არ დარჩა,
მაშინ იწყება დუმილი და ფიქრის ცუნამი,
იპოვე ძალა, არ გახვრიტოს შუბლი დამბაჩამ,
რადგან სათქმელი, დამიჯერე, -თურმე სულ არი...

9.11.2014წელი