ნინო დარბაისელი

გასაქცევ-შესაქცევისა
- - - - - - - - - - - - - - -
(ციკლიდან: ,,ეტიუდები")

თუ სამშობლო
ისე გიცქერს,
ვით ავქალი - გერს,
თუ გულს გიკლავს
დღენიადაგ,
მისთვის ანაძგერს, -

- შეგიწირავს,
თუკი დროზე
ვერსად წაუხვალ.
რაც დღეს არ გაქვს,
ნუ გგონია,
მოგეცემა ხვალ.

გამოსავალს -
ვეღარ ვხედავთ,
- მხოლოდ გასავალს.
ხსნას ველით და
ემატება
ვალი ისევ ვალს.

ყველამ იცის,
უჭირს, უჭირს
ძალიანაც ერს.
ზოგი,
ვითომც არაფერი,
მაღლა იშვერს ცერს.

გატოკდები?! -
- მიგასრესენ,
ვით მინაზე მწერს...
ნინომ რა ქნას,
აჰყვა წერას -
- შესაქცევად წერს.

ვისაც უნდა,
აუხსნელი
გაიგოს და ხსნას!-
- უწინდელი
გაიხსენეთ:
,,- ღმერთი მოგვცემს ხსნას!"


1992-2015