მარტის უბრალო დასაწყისი_ მაისის ბოლო…
გაზაფხული კი ჰამაკია ჩვენს ორ ხეს შორის,
იყო მზე, წვიმა, შიგადაშიგ მცირედი თოვლი,
იყო სხვა ხეთა სიახლოვის ნარევი ჭორიც.
იყო მაღალი შავი ზეცა, მთვარისფერ ლუქით,
ლუქის იქით კი ნელი ტემპი, მინორი, განცდა...
და მივხვდი, თურმე არ ვყოფილვარ იმაზე უკეთ,
ვინც გაფრენაზე მეტყველ ფანჯრებს უვადოდ გაცდა.
გადაჭკნა მარტი, გაიღვიძა აგვისტომ. (როქი)…
მოთბო ზაფხული დასტყობია ზეცას ამინდზეც,
ახლა ისეთი სუსტი არის ნარჩენი თოკი,
რომ დავეკიდო, საყულფედაც ვეღარ გამიძლებს…