სანამ ბოლომდე გადავიწვი,
როგორც უწყლოო ჰიდროსტატი,
როგორც უცეცხლო ჰეროსტრატე,
მინდა, მკლავებზე გადამიწვე,
როგორც ქმნილება-დიდოსტატის.
სანამ ღამეები აივსება
მუნჯი სიზმრებით და უტიტრებოდ,
იქნებ, გავიხსენოთ უტიფრობა,
უენძელებო და უტიტებო,
უცისფერო და ალისფერი.
სანამ წყალს მოგიტან უდაბნომდე,
სანამ რიგებია ქარავანთა,
ტიტი-კაკასთან და ფარავანთან,
სადაც ფრთები არის ფარვანათა,
შელახული და უდაფნოო.
სანამ სიკვდილთან პაემანზე,
პატარძალივით ვაგვიანებ,
შენახული და ნაღვლიანი,
მინდა, სიცოცხლე ვაღიარო,
ტაიტიზე და კაიმანთან.
სანამ ბოლომდე გადავიწვი.
მინდა მკლავებზე გადამიწვე.