შევხედე დამაბრმავა
გუგები დამატყავა
ოცნებით გამაკავა
ვფიქრობდი როდის წავა
  ხელებით დამიმონა
  ფილტვები დამიბოლა
  ტუჩებზე დამითოვა
  სურნელი დამიტოვა
ბუნება გამიშავა
მზე კიდე ამიჭრელა
ფიქრები გამითავა
სხვა ყველა დამიბნელა
  შიმშილი დამავიწყა
  წყურვილი დამილუქა
  ჭადივით გამაფიცხა
  და კანი გამიმუქა
თმები სულ გამაცვივა
წვერები გამეზარდა
გრძნობებში გამაცივა
მხოლოდ ის გამეხარდა
  ფეხები ამატკივა
  ფრჩხილებმა ამაკივლა
  მთელ ტანში გამიარა
  დამეტყო მე იარა
წელმა მთლად დაიხარა
წარბები გამითეთრა
გულმა კი გაიხარა
გულმა კი გამიმეტა
  გულმა ის შეიყვარა
  შიგ გულში შეიტანა
  გულმა მთლად მიმატოვა
  სხვის ფიქრებს მიმაქსოვა
გულმა სულ ამიტაცა
ტკივილით გამიტაცა
გულმა გული დაინახა
სიყვარული ჩაისახა
  გულმა გაველურებულმა
  გულმა სულ გაგიჯებულმა
  გულმა აბობოქრებულმა
  გულმა განმარტოებულმა
გულმა მხოლოდ ცივმა გულმა
სამუდამაოდ დამადუმა
ერთი ნახვის გულისათვის
ამა სოფელს გამაცდუნა.....