მოხუცი ქალბატონი ფრანგულ რესტორანტთან შეჩერდა და ღია ფანჯარაში ღიმილით შესძახა:
- “ბაყაყი გაქვთ ქალბატონებო?”
და წამით მოვწყდით რეალობას.
მოხუცი ქალბატონი, რომელსაც ფეხები ალბათ ხათრით დაატარებდნენ, რომელსაც ძლიერ შესუსტებული მხრები ერთმანეთთან ახლოს მიეტანა, შეჩერდა ფრანგულ რესტორანთან და იხუმრა. მას ისევ შეეძლო ხუმრობა.
ახალგაზრდა, კიბეზე ჩამომჯდარი გოგონები კი, მატერიალიზმზე და მატერიალურზე ლაპარაკობდნენ, იშვიათად იღიმოდნენ და იმაზე უფრო იშვიათად იცინოდნენ .
  ორმა ბიჭმა ჩამოიარა. არ იყვნენ შეუხედავები. საქმიანი ტემპით საუბრობდნენ, საქმიან ნაბიჯებს დგამდნენ და დარჩენილ დღეს წამებით ანაწილებდნენ.
  ოდნავ დიდი მაისური, კარგი ჯინსები, ლამაზი კედები და კოჭებამდე ჩანთა - გოგონა, რომელიც ნასესხები სტილით მოძრაობდა და სევდიანი ეძებდა თავის მეს. საიდანღაც მოტანილი კმაყოფილი სახით, თუმცა ყველაზე უკმაყოფილო და გაურკვეველი საკუთარ თავში, იმ დღეს შეხვედრილ ადამიანებს შორის.
  უამრავზე ცოტა მეტი წყვილი. გოგო-ბიჭი, გოგო-ბიჭი.
დადიან ბედნიერები და ხალისიანები, ხელგადახვეულები ან ხელჩაკიდებულნი, ამჩატებული ნაბიჯით და აჩქარებული გულით.
  სკოლიდან გამოღწეული ბავშვები. ბევრნი არიან სხვათაშორის.
უცნაური გარეგნობის მამაკაცები - ულვაშებიანი და პირიქით.
  მანდილიანი მანდილოსანი გამოვიდა ერთ-ერთი რესტორნიდან ჩქარი ნაბიჯით. ამ ბოლო დროს ქალები უფრო ჩქარობენ, ვიდრე კაცები.
გაფუჭებულ საათს დრო ეწევა და უსწრებს.
ბედნიერია ადამინი, რომელიც მატერიალისტია და ფიქრობს მატერიალურად მატერიალურზე. უბედურია ადამიანი, რომელიც არამატერიალისტია და უწევს ფიქრი მატერიალურად მატერიალურზე.
არ მოსთხოვო საკუთარ თავს ის, რისი მოთხოვნაც ჯერ ძალიან ადრეა.
ეს გაგანადგურებს.
  დედამიწაზე “შავ ღვინოში ალუბლები ბანაობენ” და “სპილოები ჭამენ მალინებს”
  არსებობენ შეყვარებული ადამიანები, არსებობენ ადამიანები, რომლებიც შუაში გავლისას ჯერ კიდევ იხდიან ბოდიშს, არსებობენ მანდილიანი მანდილოსნები, არსებობენ მატერიალისტები და არამატერიალისტები, აბსურდისტები, საქმიანად მოსაუბრე ბიჭები, იშვიათად მომღიმარი გოგონები, ადამიანობაში დაბნეული ადამიანები და არსებობს მოხუცი ქალბატონი, რომელიც ფრანგულ რესტორანთან შეჩერდა და ბაყაყი იკითხა.
იცით, იხუმრა.
                                                          04.10.08. 
                                                          00:19
ა