დღეს ზღვაზე ფიქრი ამეკიდა
და მეც დავიჩემე.
სიზმრებში ნანახი ტალღების თამაშის ხმა ისე გავიჩემე,
ისე შემისისხლდა,
ვეღარ დავივიწყებ, ვეღარ გავუცვლი სხვას.
დღეს ისევ ქვიშაში მომინდა თამაში,
ზღვა ჩემზე თავნება და ჩემზე ჯიუტი თავისას არ იშლის,
დავხატავ - წამიშლის...
დღეს ცაზე მთვარეა, უტყვი და პირქუში,
მე კი ცისარტყელის მომინდა დანახვა
მზიან ცას ღირსების სარტყელად რომ აკრავს და ვერვინ დამიშლის!
ოცნების ფრთებს გავშლი კიდემდე კიდიდან.
უკვე შევეჩვიე კვებას ფანტაზიით და დღემდე ვინახავ ნიჟარას ბალიშთან...
მე ჩემს ზღვაზე ფიქრი ამეკიდა,
ისე გავიჩემე, ისე გამიმისა,
ვეღარ დავივიწყებ, ვეღარ გავუცვლი სხვას.