მე ისე მიყვარს შეცისკრება შენი თვალების,
და თეთრ ღაწვებზე მობანავე ცრემლების თოვლი...
თოვლი... თოვლი და სქელი ბოლი _ თამბაქოსფერი _
და შენს საწოლთან მოფენილი ყაყაჩოს მტვერი!
ჩემს კუნძულიდან გაიტაცეს რითმების მუზა,
და უხომალდოდ დაშვებული დამირჩა ღუზა.
გულის ღიღილო, მსურს გაგიმხილო ჩემი ბგერები...
შენს სათუთ თითებს, სიმებს რომ ითრევს ღამის ფერხულში,
                                                                                  კვლავ ვეფერები...
შენი მუსიკა სულში შევუშვი,
სადღაც სიღრმიდან მე ამოვთქვი შვებით მინორი;
დავრჩით ჩვენ ორი
და ჩემი სულის სილუეტი შენსას ირეკლავს,
ჰანგი ჰანგს მოსდევს და ნეტარებით, ჟინით და ვნებით,
ჟინი და ვნება, სულში რომ დნება, ღამის სიმებს კლავს.
და მე მამშვიდებს შეცისკრება შენი თვალების,
და შენს თვალებში დანახული მზის მწველი მზერა.