_ შემოდგომაში საღამო მიყვარს. დიდი წითელი მზით და ჭრელად მოფრიალე, სიყვარულით ათრთოლებული ქალივით გაფანტული ფოთლებით მოფენილი.
გაზაფხულში იასამანი მიყვარს, დილის ნამით გასველებულ-გაბრწყინებული. კიდევ მსხლის ყვავილობა..მათრობს თავისი მოზუზუნ-მოფუსფუსე ფუტკრებიან-ჭიანჭველებიანად.
ზამთარში ასვეტილი ფანჯრებიდან დანახული თოვლით დამძიმებული ნაძვები მიყვარს, ბუხარში ალმოდებული შეშის ტკაცა-ტკუცი და სავარძელში ჩაწოლილი ფურცლებშემოყვითლებული წიგნი.
ზაფხუშლი კი ის ალიაქოთი მიყვარს, რომელსაც ყველა, რატომღაც, დასვენებას უწოდებსო _ ამბობდა ჩურჩულით, თითქოს ცდილობდა ბგერის ხმაურით არ შეეკრთო, არ შეეშინებინა ის სიმშვიდე, რომელიც გარშემო დავანებულიყო. ამიტომაც ებრძოდა თავის თავში იმ ძლიერს, ყველაზე ნამდვილი რომ იყო იმ წუთას მასში _ სურვილი... თითებსა და თვალებში გამომწყვდეული სურვილი მისი თმების შეხებისა.
_ და ყველაზე მეტად რა გიყვარს?
_ ყველაზე მეტად?... ყველაზე მეტად ოცნება მიყვარს.
_ოცნება?!რატომ??
_..ოცნება ის სამყაროა, სადაც ყველაფერი იდეალურადაა.. ჩემი წარმოდგენებით შექმნილი იდეალური სამყარო..
_ხო.. მეც მიყვარს.. გჯერა ოცნებების ახდენის??
_ კი. თუ ადამიანი მოინდომებს, ყველაფერს შეძლებს. ანუ ადამიანს ყველაფერი შეუძლია, რაც უნდა.
_ და შენ ისრულებ ოცნებებს?
_ ..არა.
_ რატომ?
_ არ მინდა და იმიტომ.
_ თუ არ გინდა, რაღატომ ოცნებობ მაშ იდეალურზე?
_ ...იდეალური მანამდე დარჩება ასეთად, სანამ ის მიუღწეველი იქნება..
_ ..სურვილები?!
_ რა, სურვილები?
_ რით განსხვავდება სურვილები და ოცნებები ერთმანეთისგან?
_ ... საერთო ის აქვთ, რომ ორივე სურვილია.. მაგრამ ოცნება უფრო შორეულია..
_... და ოცნება რომ სურვილად აქციო, არ შეიძლება?
_ შეიძლება. ყველაფერი შესაძლებელია. სურვილიც შეიძლება აქციო ოცნებად...
_ ... მგონი შენ ეგ გჭირს. სურვილები და ოცნებები ერთმანეთში გერევა... არ მესმის, რატომ უნდა აქციო სურვილი ოცნებად?!!
_ ....ისეთი სურვილებიც ხომ არსებობს, დასაწყისშივე რომ არის განწირული...
_ შენ თვითონ არ თქვი, ადამიანს ყველაფერი შეუძლია, რაც უნდაო?!
_ კი. მაგრამ ადამიანს უნდა ის, რაც აკლია... ალბათ, არც იმდენად მაკლია, რაკი არ ვცდილობ, რომ შევძლო...
_ ... სულ რომ აღარ გქონდეს?
_ არ ვიცი... არც კი ვიცი... შეხედე, ის ვარსკვლავი რამხელაა...
ცას აჰყურებდნენ. ყველაზე კაშკაშა ვარსკვლავი მათ თვალებში ორ წყვილად გასარკულიყო და სურვილი.