ალვნიდან მთაში წავიდა
ახალ ნაყიდი ცხენითა,
არა ჩანს დაღონებული
მიდის ხმადაბლა მღერითა.

ნისლი შემოწვა დაბლიდან
თორღვაის ვიწრო ხევზედა,
სავალად ბრტყელი გზა არის
გაჭრილი სალსა კლდეზედა.

ფიქრობდა ტყის თავში ავალ
იქ გავათენებ ღამესა,
მთიდან მომსვლელნიც იქ მოვლენ
ახალს გავიგებ რამესა.

საჩაღმო გზიდან ჩამოჩნდნენ
მგზავრები პირიქითიდან,
გომეწრის მხრიდან მომსვლელნიც
გადმოჩნდნენ გორის იქიდან.

მიიპატიჟა სუყველა
მთით-ბარად მიმავალია,
ბარიდან მე ვარ მოსული
დახვედრა ჩემი ვალია.

ცხენს ჩამოხადა ხურჯინი
ტიკები გადანაკიდი
დაალევინა სუყველას
არაყი გაღმა ნაყიდი.

ცხენებს მოხადეს გაუშვეს
ნოლი აძოვეს ბალახი
საჭმელი ჭამეს,დალოცეს
გზა მამა-პაპათ ნალახი.

ამბობდნენ ტახტიგორს გაწყდა
ზეზვაის ცხენის კვალიო,
ძვალს და რბილს უფრო ჰკვეთავდა
გულუხათ შეთეს ხმალიო.

შესანდობარიც დალიეს
ვისაც აქ უწინ უვლია,
ვისაც კი ცხენით,საკაცით
ამ გზაზე გამოუვლია.

ის ღამე აბანოს თავში
სუყველამ ერთად ათიეს,
ცეცხლი დაანთეს დიდრონი
წიფლის კუნძები ათრიეს.

ადრევე წამოიშალნენ
ცხენებს აჰკიდეს ბარგი,
არაყი შესვეს უსურვეს
ერთურთს მგზავრობა კარგი.

რა ირიჟრაჟა გაშორდნენ
ყველა დაადგა თავის გზას,
ცერიდან შურთხები სტვენენ
რას მოიშლიან თავისას.

მთას გადავიდა ადრევე
ხევ-ხევ დაუყვა მდინარეს,
მღერის,აღვიძებს მიდამოს
ღამე ნათევსა მძინარეს.

იორღით მიჰყავს ფეხთეთრი
ჭალა ადრევე გალია
გოხიან გზაზე ცეცხლებს შლის
საღარა ცხენის ნალია.

შეუსვენებლად გადავლო
ხისოს აღმართი პატარა
გორზე გავიდა ჩამოხტა
კმარა რაც ცხენმა ატარა.

ჩამოქვეითდა მხედარი
ცხენს გაუსინჯა ნალია
ნალს არ მოგაკლებ ტიალო
ტარება შენი ვალია.

ფიჭვის სურნელი მოჰქონდა
ნიავს ცოკალთოს სათავით
ჭალამდე ფეხით ჩავიდა
ცხენი მიჰყავდა სადავით.

ომალოს აეროდრომზე
ხალხ მიმოავლო თვალია
ფიქრობდა ვინმე შემხვდება
პირიქითს მიმავალია.

არავინ შეხვდა წამსვლელი
პირიქითისკენ "მონასა"
ასე თქვა არც ვარ ჩვეული
მე თანამგზავრის ყოლასა...