გარეთ ოქტომბერმა ღამე გაათია...
ისევ ვერ ვიძინებ...
თენდება...
ჰო,
მე შემიძლია ბევრი გაპატიოთ,
თქვენც ხომ შეგიძლიათ ჩემდენი...

ვხატავ ფანჯარაში ჩასმულ განთიადებს,
სუსტი ნერვები მაქვს, ვჩერდები...
მე რომ შემიძლია თქვენთან გავმთლიანდე,
თქვენც ხომ შეგიძლიათ ჩემდენი...

წვიმა ათამაშებს თვალს და გუგებს,
ვხვდები, არ გამომდის შედევრი...
ესეც შემიძლია - სხვას გავუგო,
თქვენც ხომ შეგიძლიათ ჩემდენი...

მინდა სიცოცხლესთან კენჭი ვყარო...
ზეცა ღრუბლის უკან შენდება...
მე ეს შემიძლია, ყველა შევიყვარო,
თქვენც ხომ შეგიძლიათ ჩემდენი...

მთვარემ ღრუბელი რომ ვერ გარიყა,
ჩემს თავს გადაგდებით ვჩემდები...
ჰო,
მე შემიძლია შენთან ვიყო,
შენც ხომ შეგიძლია ჩემდენი!..